Heb 8 | NdeBEN | STEP | Isiqokoqela salokho esikutshoyo yilesi: Silaye umphristi omkhulu onjalo, owahlala phansi esandleni sokunene kwesihlalo sobukhosi soMkhulu ezulwini,

Hebrews 8

Umphristi Omkhulu Wesivumelwano Esitsha

1 Isiqokoqela salokho esikutshoyo yilesi: Silaye umphristi omkhulu onjalo, owahlala phansi esandleni sokunene kwesihlalo sobukhosi soMkhulu ezulwini, 2 okhonzayo endaweni engcwele, ithabanikeli eliqotho elamiswa yiNkosi hatshi ngabantu.

3 Umphristi omkhulu ngamunye ubekelwe ukunikela izipho lemihlatshelo, ngakho kwakufanele ukuba lalo abe lolutho alunikelayo. 4 Aluba wayesemhlabeni wayengayikuba ngumphristi ngoba bevele bekhona abantu abanikela izipho eziphawulwa ngumthetho. 5 Bakhonza endaweni engcwele engumfanekiso lesithunzi salokho okusezulwini. Yikho-nje uMosi waxwayiswa lapho esezakwakha ithabanikeli ngokuthi: “Qaphela ukuba wenze konke njengalokhu owakutshengiswa entabeni.” ^{▼▼U-Eksodasi 25.40} 6 Kodwa inkonzo uJesu ayemukeleyo ingcono kuleyabo njengesivumelwano yena angumeli waso singcono kulesidala njalo sakhelwe phezu kwezithembiso ezingcono.

7 Ngoba aluba kwakungelalutho olungalunganga kusivumelwano sakuqala leso, akulasizatho esasingadingelwa esinye. 8 Kodwa uNkulunkulu wathola isici ebantwini wasesithi:

“Isikhathi siyeza, kutsho iNkosi,
lapho engizakwenza khona isivumelwano esitsha
lendlu ka-Israyeli
kanye lendlu kaJuda.
9 Kasiyikufana lesivumelwano
engasenza labokhokho babo
lapho engababamba khona ngesandla
ukuba ngibakhuphe eGibhithe,
ngoba kabaqhubekanga bethembekile esivumelwaneni sami,
ngasengibadela,
kutsho iNkosi.
10 Nansi isivumelwano engizasenza lendlu ka-Israyeli,
ngemva kwalesosikhathi, kutsho iNkosi.
Ngizabeka imithetho yami ezingqondweni zabo,
ngiyilobe ezinhliziyweni zabo.
Ngizakuba nguNkulunkulu wabo,
bona babengabantu bami.
11 Umuntu kasayikufundisa umakhelwane wakhe,
kumbe umfowabo, esithi, ‘Yazi iNkosi,’
ngoba bonke bazangazi,
kusukela komncinyane wabo kusiya komkhulu.
12 Ngoba ngizabathethelela ububi babo,
njalo angiyikukhumbula izono zabo futhi.” ^{▼▼UJeremiya 31.31-34}
13 Ngokuthi isivumelwano lesi “sitsha” wenze esakuqala sangasasebenzi; futhi okungasasebenzi lokugugileyo kuzanyamalala masinyane.